سوشيال تريند
نشرت الفنانة راندا البحيري، مقطع فيديو جديد لها على حسابها الشخصي، عبر موقع تبادل التواصل الاجتماعي فيسبوك.
وظهرت راندا، خلال الفيديو وهي منهارة من البكاء.
وقالت: “بتمنى تكوني دلوقتي كويسة، وأنا متعلقة بشيرين أوي، وأول مرة زعلت من شيرين أوي لما عرفت انها هتعتزل الفن قبل كدة، ووقتها كنت حزينة ومخنوقة بشكل كبير، وحسيت إن قرار اعتزالها مش ملكها، وده حق مش حقك، يعني شيرين بتاعت المصريين، يعني احنا هنتمنع نسمع صوت شيرين تاني، وفضلت أقول يا رب الكلام ده ميطلعش صح، ولو اعتزلت هتمنالها كل توفيق”.
وتابعت: “قرار اعتزالها قبل كدة ضايقني جدا، وتعبني، وكنت مضايقة اننا مش هنستمتع بشيرين كمطربة تاني”.
وأضافت: “بتمنى انك تكوني عارفة غلاوتك ومقدارك عند ناس كتير جدا كبير، والواضح أنك مش عارفة كده خالص، لأنك لو عارفة المشكلة هتخلص، والواحد دايما محتاج دافع عشان يعيش عشانه، ومحتاج حاجة يبقى عايش لها، تجدد شغفه عشان يعيش في الدنيا”.
وأكدت: “حب الناس والشغل حاجة كبيرة جدا، إنها تخلي الواحد يبقى عايش ويتمسك بالدنيا ويقف قدام أي مرض وأي حاجة لو متأكد ان اللي حوليه بيحبوه، وإن فيه ناس كتير أوي ممكن تتأثر بجد وتزعل على زعله وتتبسط لإنبساطه”.
وأوضحت: “أنا محبة لشيرين بشكل كبير، وهي صعبانة عليا جدا جدا، ومضايقة عشانها أوي، ومكنتش حابة خالص إنها توصل للمرحلة دي من الوجع، وبدعيلك يا شيرين من قلبي، وبحبك والله أوي”.
وأشارت: “هفضل مضايقة عشانك يا شيرين لحد ما تبقي كويسة، وأوعديني وأوعدي جمهورك انك ترجعلنا قوية وكويسة وحلوة، واحنا بنحبك أوي”.