سوشيال تريند
أخطاء عديدة نقع فيها أثناء تنفيذ ديكورات المنزل، تتسبب في اختلال طاقة المكان حسبما ذكرت الدكتورة سها عيد خبيرة علم الطاقة، خلال لقائها مع الإعلامية «شافكي المنيري»، في برنامج «التاسعة» المذاع عبر القناة الأولى بالتليفزيون المصري، موجهة بعض النصائح والتحذيرات المؤثرة على الطاقة.
لا يفضل وضع السرير بجوار حائط الحمام
وحذرت خبيرة الطاقة، من وضع السرير بجوار حائط الحمام: «عندنا 4 حوائط للغرفة ولما يكون عندي حيطة مشتركة مع حمام مينفعش أحط جنبها السرير، لأن عندنا مسارات مياه، والمياه متحركة وغير ساكنة وبتعمل أرق وعدم راحة وبيخليه في وضع قلق وغير مستقر».
وقالت خبيرة الطاقة: «غرف النوم أدام الحمام وده غلط جدًا، ولازم نرحل باب الحمام لأنه مسار طاقة مندفع».
وأضافت: «وجود الحمام داخل غرفة النوم غلط وبيعمل مشاكل صداع وأمراض في الصدر، لأن فيه مسار طاقة مندفع، والأمراض بتصيب الزوج أو الزوجة اللي بينام على الحرف اللي أدام الحمام».
المرايات داخل غرف النوم
وحذرت من وجود المرايا بكثرة داخل غرف النوم: «لا يجب أن تكون هناك مرايا كثيرة في غرفة النوم، والمرايات على الدولاب غلط كبير، وعاوزين نرجع زي زمان إن المراية تكون جوه الدولاب، والمراية في وش السرير انعكاس طاقة غير لطيف».
وتابعت: «المراية الحجم الكبير في الجيم أو مكان فيه حركة ونشاط وطاقة عالية لأن المراية بتصحصح البني آدم وده مكان نوم».
وحذرت خبيرة الطاقة من زراعة الصبار في المنزل أو البلكونة: «بلاش الصبار لأنه معروف أنه بينمو في الأماكن المهجورة اللي مفيهاش حياة زي المقابر والأماكن الصحراوية»، ونصحت بالاهتمام بالبلكونة وتجميلها «فرفشوا البلكونات».
ضرورة الاهتمام بالألوان
ونصحت خبيرة الطاقة بارتداء الألوان الزاهية: «ارتدوا الملابس الملونة وكل لما تكون الألوان مفرحة ومبهجة بتنعكس على شخصيتك»، مضيفة: «البيت لو ألوانه مش مظبوطة هيحصل فيه مشاكل واللي عندهم ستاير أو كنب أحمر في أسود عارفين إن فيه مشاكل زوجية».
كما حذرت خبيرة الطاقة من الكراكيب: «الكراكيب بتؤثر على الطاقة لأنها بتسد مسار الطاقة المتحرك في المكان وتسبب قفلة، والكراكيب تحت السرير بتسبب مشكلة»، مضيفة: «الكراكيب مبتخليش الإنسان يجي له خير، وبتقفل طاقة الخير والبركة لأنه كدس حياته».
وطالبت بأن يتبع الإنسان شعار «تخلص من القديم يأتيك الجديد»، محذرة: «الكراكيب لما بتمر عليها سنة بتوقف الحال خلال سنة».
ونصحت بتغيير أثاث المنزل باستمرار: «الحركة بركة واللي بينقلوا الأثاث بيحسبوا براحة، والتغيير مهم جدا وكل لما بتغيري بتحركي مسارات الطاقة المخفية في المكان».
تحذير من وضع البوتاجاز بجوار الحوض
وحذرت من بعض الألوان في دورات المياه: «الحمامات اللي لونها أزرق أو اسود فيها مشاكل في السباكة لأن الطاقة المائية في مكان مائي وبيحصل قفلة».
وأرجعت السبب في المشاكل التي تحدث في البيوت، لوجود البوتاجاز بجوار الحوض «الناس اللي بتتخانق كتير قوي، هتلاقي عندها البوتاجاز لازق جنب الحوض عنصر الماء لازق جم عنصر النار، ولازم يبقى فيه بينهم مساحة لا تقل عن 40 سم».