سوشيال تريند
كشف الطبيب النفسي محمد طه، عن رأيه في تفاعل الجمهور مع ظهور الفنانة رحمة أحمد في مسلسل “الكبير أوي 6” وتجسيدها لشخصية “مربوحة” والاهتمام الإعلامي بها.
حيث قال دكتور محمد طه: ظهرت الفنانة الواعدة، الشاطرة والمجتهدة (رحمة أحمد)، فى حلقة من مسلسل (الكبير) من يومين قامت بآداء دورها باجتهاد واضح وتلقائية عالية وخفة ظل فتحت لها قلوب الجميع علشان نلاقى تانى يوم مش بس ترحيب كبير بآداءها أو تشجيع مفهوم ليها فى بداية مسيرتها الفنية الناجحة بإذن الله لأ اللي حصل -فى رأيي- هو البداية المعتادة والمتكررة لما أسميه دورة (حرق النجوم).
وأوضح قائلا: “خلينى أقولك إزاى يمكنك/يمكننا حرق نجم فى بداية سطوعه، نعمل موجة هائلة جداً من الافتتان والإعجاب والمدح والثناء -اللى هى تستحق كثير منهم- لكن ندى الأمر أكبر من حجمه ونضخمه لحد الهوس Mania.. ونحوله لتريند (يفاجئ صاحبته نفسها) فى عدة ساعات”.
وتابع قائلا: ” نبدأ نحطه فى خانة المقارنة.. مقارنة باللى قبله واللي زيه واللى بعده.. زى ما تمت مقارنة (محمد هنيدي) فى بداياته مع (عادل إمام).. ومقارنة (تامر حسني) فى بداياته مع (عمرو دياب) و(مصطفى حسني) فى بداياته بـ(عمرو خالد) و(محمد صلاح) بـ(محمد أبوتريكة) و(محمد أبو جبل) (بالشناوى) فى الحالة دى تمت مقارنتها فوراً بالنجمة (دنيا سمير غانم) مقارنة ظالمة وغير مبررة ولا ليها أى معنى، لدرجة إنها شخصياً قالت: يا جماعة “دنيا سمير غانم لا تقارن بحد وأنا من فانز دنيا ولو اتحطينا فى مقارنة أنا الخسرانة”، لكن إزاى إحنا المقارنة فى دمنا وفى ثقافتنا وفى تربيتنا إحنا بنتغذى على المقارنة إحنا بنرضع أطفالنا مقارنة بينهم وبين قرايبهم وأصحابهم وزمايلهم”.
وأوضح: “ياللا بقى ندخله فى صراعات وفى حالتنا يقولك: ده الفنان (أحمد مكى) مديها مساحة وسايبها تتكلم هى كده ممكن تسرق الكاميرا منه وتطلع الفنانة الشابة بأدب وذوق وتقول: “إن فنان زى أحمد مكى يدى مساحة لحد دى حاجة مابتحصلش والراجل عنده اللى يكفيه وزيادة إنه يسيب فنان قدامه يقول وهو سايب إيده”.
واستكمل قائلا: “بسرعة بسرعة وقبل مزيد من الجهد والاجتهاد والشغل على النفس والمهنة والنجاح المتصاعد بثبات.. ندبسها فى دور بطولة مطلقة ونعرض عليها عروض سريعة تحرمها من فرص النضج الفنى الحقيقي. نحولها.. لنمبر وان.. معرفش مؤنث (وان) إيه .
وأختتم قائلا:” نتتبع أخبارها.. كل كلمة.. كل خطوة.. كل لبس كل حاجة، وعند أول غلطة، استنكار ومشاكل وقيل وقال لأنها طلعت مش عند توقعاتنا.. لأنها خرجت بره الصندوق اللى حطيناها فيه.. نحن نلد النجوم.. ثم نحرقها”.
مقالات أخرى قد تهمك:
غير «مربوحة» و«هدية».. من هي زوجة أحمد مكي التي أخفاها عن الأنظار؟
بعد تألقها في دور «مربوحة».. مفاجأة وراء اكتشاف رحمة أحمد بطلة «الكبير أوي 6»